Толькі ўсталявалася цёплае надвор’е і аматары турызму, якія за зіму засумавалі па вандроўкам і прыгодам, адразу сталі збіраць заплечнікі і неабходны рыштунак, паведамляе "Браслаўская звязда". Браслаўскія турысты адкрылі сезон, паўдзельнічаўшы ў вясеннім этапе адкрытай круглагадовай турыяды "Слабодка-2013”. Яна з’яўляецца вучэбна-трэніровачным паходам, які ўключае ў сябе вандроўку, трэніроўкі і навучэнне.

Удзел у спаборніцтве на гэты раз прынялі па дзве каманды ад Ахрэмаўскай, Слабодскай, Опсаўскай, Кансталінскай школ, СШ№2 і адна ад Друйскага дзіцячага дома, а гэта каля 60 вучняў. Усе яны з’яўляюцца апантанымі і вопытнымі турыстамі і не прапускаюць ні адно мерапрыемства такога кшталту. Але на гэты раз нават ім прыйшлося складана, бо наперадзе ў школьнікаў былі не зусім звычайныя конкурсы.

Пасля пастраення ўдзельнікаў чакала першае выпрабаванне – "брод”. Згодна з заданнем, турысты быццам прамоклі і ім тэрмінова трэба было пераапрануцца ў сухія рэчы. Далей шлях ляжаў на Замкавую гару, дзе кожная група праводзіла экскурсію па гэтых знакамітых мясцінах, а потым адказвала на пытанні віктарыны.

Самая цікавая частка турыяды яшчэ была наперадзе. На аўтобусе юныя турысты адправіліся ў Слабодку, а адтуль пешшу да месца стаянкі групы. За два дні, якія доўжыўся паход, яны спрабавалі свае сілы ў начной азбуцы Морза, пераадоленні сапраўднага броду, вязцы вузлоў, паказвалі медыцынскія навыкі, перанасілі пацярпелага, у палявых умовах пісалі сачыненне пра сваю вандроўку. Адным словам, дэманстравалі навыкі, якімі павінен валодаць кожны турыст. Асабліва ўсім запомніўся конкурс, калі праз гадзіну пасля адбою іх разбудзілі і загадалі пераносіць лагер у іншае месца. І, трэба зазначыць, спраўляліся ўсе каманды з гэтымі выпрабаваннямі, выдатна. А дапамагалі юным удзельнікам іх старэйшыя таварышы. У кожнай камандзе быў кіраўнік з ліку вопытных турыстаў.